V sųzvězdji Labędja našli něčto veľmi divno

Details

Kategorija: NAUKA - TEHNIKA

Datum: Petek, 20 November 2015 19:35

Autor: Vladimir Osipov

Čitanja: 6748

V srědině septembra razom několiko velikih media napisali, že kosmičny teleskop Kepler jest odkryl na udaljenosti 1481 světľnogo roka od Solnca něčto, podobno tvorjenju vysokorazvjenoj vnězemnoj civilizacije, imenno sferų Dajsona. Napravdų ne ide molva ob kontaktě s vněplanetnym razumom, ale čto jest pričinojų neobyčnoj emisije zvězdy KIC 8462852, ne jest cělkom jasno. Sejčas ja bųdų povědati, čto jest tako neobyčno v KIC 8462852 i za čto odkrytje prinudilo govoriti ob vnězemnoj civilizaciji.

Zvězda KIC 8462852 v sųzvězdji Labędja jest znana dosť od davna. Vprvo vnimanje k jej privlěkli dobrovoľci raziskivateľnogo projekta Planet Hunters, ktori razbirajųt dostane teleskopom Kepler dane. Projekt rabotaje tako: dobrovoľci musęt ględěti na izobraženje od Keplera i nahoditi na ih temne kųski — oni možųt značiti, že někaka planeta mijaje prěd svojejų zvězdojų. Izględaje tamto ako kratko padanje uravnja emisije zvězdy.

Oči obyčnogo člověka podhodęt dlja takogo cělja lěpše, než programne srědstva. V těčenji pęti lět raboty Planet Hunters už sųt uspěli odkryti několiko planet a sųt označili několiko desętok možlivyh kosmičnyh prědmetov. Padanje emisije bylo odkryeno i v slučaji KIC 8462852, medžutym jej rod kaže ob tom, že okolo planety vračaje sę někoj prědmet dosť velikoj masy. Tako jest polno možlivo, jestli zvězda jest veľmi mlada, i okolo jej vračaje sę kolce pyla, iz ktorogo pozdněje gravitacija bųde tvoriti planety, jednakže KIC 8462852 jest už stara zvězda. Daže jestli ona by byla mlodojų, vtogda možlivo by bylo uviděti dostatočno, v časě takom, infračrvenogo světla — ale se ne bylo uviděno.

Priblizno jedin raz v 800 dnjev emisija zvězdy padaje na 15–20 procentov, piše The Washington Post. Snižka jasnosti zvězdy može trvati několiko sedmic, a v 2013 roku serija takih snižk trvala až tri měsęca. Prisųčnosť pri zvězdě, napriklad, najvęčšej planety solnečnoj sistemy Jupitera by vedlo do padanja uravnja emisije toliko na jedin procent. Nikake dane, že okolo KIC 8462852 jest kojakoli planeta, ne istnujųt.

Porędok povyšeń i snižek emisije KIC 8462852 jest taki neobyčny, že nikaka zvězda iz znanyh 150 tysęč ne povtarjaje jego. Sųglasno naučniku universiteta Jelja Tabetě Bojadžian, izdavšej v septembrě 2015 roka tvorbų ob KIC 8462852, na počętku raziskivateli mněli, že imajųt dělo s někojejų tehničnojų grěškojų — oni ne mogli uvěriti, že dane ob emisiji zvězdy napravdų reaľne. Najmožlivša versija, k ktoroj prišli Tabeta s kolegami — zvězda byla obkrųžena cělojų skupščinojų egzokomet, ktore izničila gravitacija zvězdy i ktore prěměnili sę v gaz i pyl, piše The New Scientist.

Najvęčši problem KIC 8462852 jest nedostatok danyh ob rodě sej emisije. Kosmičny observatorium, s pomočjų ktorogo udačili najdti anomalijų, běše čęstično slomal sę dva roka nazad, i v aprili 2015, kogda iznova očěkivali neobyčnų emisijų zvězdy, ne mogl ničto izměriti. Raziskivateli nadějųt sę, že bųdųt mogti izučiti zvězdų v maji 2017 roka, kogda očěkivajųt nastųpno izjavjenje anomalije.

Jednakže, už sejčasna informacija jest dostatočna, že by do KIC 8462852 udělili vnimanje naučniki. Kollega Tabety Bojadžian iz universiteta Pensiľvanije Džejson Rajt planuje izdati sobstveno raziskivanje emisije KIC 8462852. On hče objasniti anomalijų bytostjų vokrųg zvězdy tako zvanoj sfery Dajsona — teoretičnogo prědmeta sferičnoj formy, izbudovanogo okolo zvězdy. Prědpokladajųt, že taka sfera može dozvaljati efektivno koristati energijų zvězdy; posrěd jej upotrěbjeń sųt razrěšenje problemy prostora živobytja, a pųtovanja s nadsvětlovojų bystrostjų.

Sfera Dajsona istnuje toliko na papěrě (vključajųč fantastičnų kniževnosť), nikake srědstva jej tvorjenja člověčstvu ne jest znajemy. Razvažajųt, že sfera može byti znakom vysokorazvjenoj vnězemnoj civilizacije.

Rajt kaže, že čudži — se jest poslědno, ob čem musi mysliti astrofizik, a podčrkaje, že bųde veľmi skeptičnym v svojem raziskivanji. «Ale tym ne menje, to izględaje tako, kako očěkivaješ od něčta, izbudovanogo čudžimi», — kaže naučnik. Imenno slova Rajta ob sfere Dajsona okolo KIC 8462852 pričinili tako mnogo publikacij i govorov ob vnězemnyh civilizacijah. Priblizno takože obgovarjali v konci 1960-yh ob pulsarah — ih emisija byla veľmi podobna vnězemnomu signalu.