Najdeno město padenja «Schiaparelli»
- Details
- Kategorija: NAUKA - TEHNIKA
- Datum: Nedělja, 23 Oktober 2016 13:20
- Autor: Vladimir Osipov
- Čitanja: 7877
Evropejska kosmična agencija jest opublikovala foto maza, ktory pojavjil sę na městě padenja prizemjanogo aparata «Schiaparelli». Sųglåsno ekspertam, aparat učinil padenje od vyšiny 2-4 kilometra i stolkl sę s Marsom s bystrostjų vyše 300 kilometrov v časinų. Možlivo, že v moment padenja aparat izbuhnųl sę, za to že jego palivny banki byli polnymi. Na to ukazyvaje veliki råzměr města avarije.
Foto bylo sdělano kosmičnojų sondojų Mars Reconnaissance Orbiter (MRO). Eksperty misije sųt sråvnili medžu sobojų dva foto, sdělanyh do i poslě padenja aparata, i sųt najšli dva detalja krajovida. Jedin iz nih — temny maz s veličinojų 15x40 metrov (možlivo, že se jest udarny krater od aparata), drugi — jasny maz, ktory može byti parašutom «Schiaparelli». Udaljenosť medžu objektami jest okolo 1 km.
Družina misije «ExoMars» ukazyvaje, že město padenja «Schiaparelli» nahodi sę toliko v 5.4 km od naměrjajemogo města prizemjanja — vnųtri načrtanoj oblasti.
Točnosť foto jest 6 metrov v jednoj točkě — ono bylo sdělano kamerojų nizkoj točnosti, instalovanoj na MRO. Vyše točno foto aparat sdělaje na nastųpnoj sedmicĕ, koristajųc kamerų vysokoj točnosti HiRISE.
«Schiaparelli» byl dolžen prizemiti sę na Mars 19 oktobra, 14:48 UTC. Sųglåsno planu misije, on byl dolžen vojdti v atmosferų planety s bystrostjų 21 tysęc km/č i zamedliti sę v vrhnyh jej plastah. Se zamedlilo jego bystrosť do 1700 km/č, potom aparat jest råzkidal parašut. Na nastųpnom etapě «Schiaparelli» byl dolžen skoristati devęť motorov dlja dodatočnogo zamedljenja. Poslědny etap skladal sę iz padenja od vyšiny několiko metrov. Dlja snižki udara byla prědviděna osobliva stiskajema platforma.
Prvy etap poizhodženja pošel sųglåsno naměru. Se potvrdžaje telemetrija, poslana vo vrěmeně prizemjanja od «Schiaparelli» aparatam Mars Express, Trace Gas Orbiter i zemjanomu radioteleskopu GMRT. V moment råzkidanja parašuta dane telemetrije načęli råzličati sę od očěkivanyh inženerami. Tako, motory aparata sųt prodějali toliko 3-4 sekundy, zaměsto minuty. Prěd 50 sekundami do očěkivajemogo vrěmene prizemjanja aparat jest prěstal posylati dane.
«Schiaparelli» byl izprva prěznačeny za izpytanje prizemjanja na Mars. Podčas sego on jest sobral temperaturne dane od teplo-ščita i dane ob okrųžajųcej atmosferě i jest odslal ih do Mars Express. Kromě togo, poslě prizemjanja aparat byl dolžen råbotati od dvu do osmi dnev, sbirajųc dane ob atmosferě na Marsĕ. Aparat byl dolžen sdĕlati prve měrjenja električnyh poľ, za to že by dovědati ih rolje v tvorjenji pylnyh burj. «Schiaparelli» — čęsť misije «ExoMars-2016», družnogo projekta Evropejskoj kosmičnoj agencije i Roskosmosa.
