Pojdimo se zamysliti!

Details

Kategorija: RAZLIČNE

Datum: Vtorek, 16 Oktober 2012 15:26

Čitanja: 5521

Tutoj členok i jego autor se snaži zamysliti nad věčami, ktore naš dennodenny život presegajut. Prošu, čitajte tutoj filozofičny tekst i togda, jegda ne budete ni jedno slovo razuměti.

Malenke predslovije

Napadly sut mne v poslědnoj době take mysli ogledno věry, obzvlašče Hristijanstva. Prošu, da by naslědujuči tekst ne čitali ľudi so zatvorjenoju mysľeju, věrozakonni fanatiki i im podobni. Preprašaju, jestli naslědujuči členok, glavno moje mysli v njem, bude někomu nesrazumiteľny – ne jest to legke tema ni k besědě ni k pisaniju izvěstije.

Mojim zaměrom ne jest napadati věru ili nějake ľudi!!! Prosto jesm ot prirody filozofom i čuduju se nad različnymi pytanijemi i snažu se iskati otvěty na moje pytanija. :)

Vsi isto znajete povědku o stvorjeniju světa, ktora jest zapisana v Bibliji na jej početku. Pro te, kto ne znajut ili sut ju zabudli, skažu v kratkom tekstě, o čem tuta povědka běše.

Bog stvoriše svět i vse, čo je v njem. Stvoriše zemju, vodu, nebo, vsu zvěř, rastliny i nakonec jego najcěnnějši iztvor – člověka. Člověk iměše gojnosť vsěgo, možeše jěsti vse, čo v ogradě Edenu rasteše i živeše. Čo je glavne, člověk běše stvorjen dľa obraza Božego. Člověk, ili muž, běše na tuto vse sam i běše mu stvorjena pomoč jemu ravna – žena. Muž imenovaše se Adam i žena běše po imeni Eva. Bog ima prikazaše, da by ne jědle iz stroma poznanija vsěgo dobrogo i zlogo. No v ogradě běše mimo ostalnyh zvěret gad*, i toj gad svednuše Evu, da by si vzela plod tutogo stroma. Eva takože daše najěsti svojemu mužu. Oba spoločno jědeste iz tutogo stroma. Bog poznaše, že muž i žena ne poslehnuste jego slovo, i člověka zavrgnuše proč iz ogrady, jerbo by člověk mogl vzeti plod iz stroma života i dostal by bezsmrteľny život.

*Něktori moji prijateli, Hristijani, sut mi govorili, že toj gad běše padly andjel – Lucifer (takože znajemy pod imenom Satan), ače li kniga Genesis, česť Biblije, ne govori ničo o tom, že v ogradě Edenu běše sam Satan. No v moju očih to davaje logiku.

Naslědno, po par věkah, izdaše Bog česť sebe, svojego jedinogo syna, Isusa Hristosa, da by Bog mogl "iměti pokoj". Izdaše svojego syna, da by byl ľuďam izvinjen prvy i povodny grěh, i da by byly izvinjeny vsi grěhy, ktore sut narobili za svoj cěly život.

Moja prva mysľ

Začo prosto Bog ne stvoriše člověka „neskaženym“ ili „neskorumpovateľnym“? O Bogu se kaže, že Bog jest dobry, že v Bogu ne možemo najti ni kapju zlogo. No člověk jest Božim iztvorom i jest stvorjeny dľa Božego obraza. Možemo kazati, že Bog ne jest skaženy (=v Bogu ne jest zlo) jako člověk – jego iztvor – ktory se nehaše svesti gadom. Začo togda ne jest člověk stvorjen k Božemu obrazu neskaženym? I to ne govorju o tom, že za to cěle, čo Bog de facto sposobiše, i za grěh, ktory narobiše člověk, nehaše izdati česť sebe samotnogo (Isusa), da by ľudi ne grěšili.

Moja druga mysľ

V moju očih to cěle ot Boga běše nějaka forma testa. Bog testovaše, jestli jest člověk poslušnym i jestli člověk vyplni Boži prikaz ne jěsti iz ovogo stroma. Bog jest takože vseviduči i vseznajuči. No začo by bylo trěba Bogu dělati nějaky test, jegda Bog uže znaje dlgo pred tym, než toj test počne dělati, jaky bude iměti test izslědok (rezultat)? Tutym de facto otsudiše člověka k tomu, da by solgal i da by byl grěšnym. Možno ovo Bog izrobiše s nějakym zaměrom, možno jest to sučesť Božego plana so světom. Kto znaje...

Moja treti mysľ

Jestli by se Bog staral, ne by tamo dal toj strom v prvom redě. Ali črezto go tamo daše. Začo?

Moja četvrta mysľ

Jestli běše toj gad napravdu padlym andjelom Luciferom, začo Bog daše andjela blizko člověka, o ktorom uže dlgo znaše, že se člověk može skaziti i nehati se svesti zlom? I jestli Satan pokušavaše člověka bez ogleda na Božu moč či Boži vplyv, tak to može značiti toliko dvě věči. Ili se Bog ne staral, čo se može stati, ili logično iměše Lucifer večšu moč/vplyv/silu než Bog, čo ali otporuje i protivi izrěčeniju, že Bog jest vsemoguči.

Moje mysli mimo „glavne tema“

Takože se čuduju nad dalšima dvěma věčima.

1) Jestvuje li napravdu peklo?

Bog vse ľudi i cěle svoje stvorjenije na tutom světě ľubi, tak začo by nějaky člověk, i toj najgorši vrag i ubijec, iměl byti v peklě? Samotny pomysľ pekla ide v moju očih protiv pomysľu vseľubivšego Boga. Da, ľubiti ne znači karati, ili ľubiti znači žrtvovati se, no zavrgnuti člověka na věčnosť do pekla, na věčnosť k životě věčnomu bez Boga? To je veľmi ľuta kara, ne myslite? Bog dľa mene ne hoče, da by nějaky člověk žil vo věčnom otlučeniju ot Boga!

2) Jest li možlive grěšiti v nebesi?

Někde jesm slyšel, že grěh sposobuje trpěnije, takže jegda v nebesi grěšite, trěbujete tamo i trpěti, da?

Ače li by bylo nemožlive grěšiti v nebesi, to znači, že ne jestvuje nijedna svobodna voľa v nebesi. Ako li ne možete v nebesi grěšiti, ne možete iměti svobodnu voľu i ne možete dělati, čo hočete. To takože znači to, že někto, iduči do nebese, se stane nemysľjuči entitoj, entitoj bez vlastnoj glavy - ače li entitoj vo věčnom staně ščestija i ľuby.

I jestli jeste tolika nemysľjuči entitoj, ne možete byti vo staně věčnogo ščestija, i togda trpite – ili ne jeste v nebesi.

Kratko povědane – jestli NE možete trpěti v nebesi, ne jest to napravdu nebo. Jestli povratno možete trpěti v nebesi, ne jest to napravdu nebo.

Blagoželaju tomu, kto došel až tutaj na konec mojego členka, i takože blagoželaju tomu, kto ne imaje po prečitaniju zaměšanu glavu! :))

Za sebe byh na konec toliko skazal, že filozofovati jest napravdu veľmi težka věč, zvlašče, ako li se snažite byti srazumlivy vsim Slověnom i ako li hočete, da by vašim mysľam razuměla prinajmeněje jedna jedina osoba.

Hvala tomu, kto je si ot mne vzel nějaku mysľ, nějaky pomysľ ili něčo podobne! Mnogo cěnju togo!

Jestli byste hotěli o tom so mnoju dalěje besědovati, jesm otvorjeny k besědě ili na facebookovoj gruppě o medžuslověnskom jezykě tutaj ili tutaj. Možete mi takože zaslati This email address is being protected from spambots. You need JavaScript enabled to view it., rad s vami probesěduju ove věči.

(Martin Čudek, 31. Jul 2012)