Julija Timošenko pred sudom
- Details
- Kategorija: POLITIKA - EKONOMIJA
- Datum: Subota, 25 Jun 2011 03:16
- Čitanja: 9524
Byvša prvy ministr Ukrajiny, Julija Timošenko, je v petok stanula pred sudom v Kijevě. Ona je obviňena v tom, že v čase svojego premierstva je zloupotrebjala vlasť i pronevěrila državne penezy, za čo grozi jej deseť lět uvezňenja. Sama Timošenko nazyva toj proces «farsoju i cirkom».
Glavnoju težboju protiv 50-lětnoj Timošenko je to, že kontrakty o gazě, zakľučene s Rosiju v 2009, sut pričinili utraty dľa ukrajinskogo državnogo skarba. Timošenko, jedna iz tyh, koje sut počeli pomarančovu revoluciju v 2004, ostro kritikuje proces. Jejnym mněnjem je go nadohnul prezident Viktor Janukovič aby otišiti opoziciju. Jestli ona bude osudžena, ona – kako pokarana osoba – v slědujučim godě ne može kandidovati v izborah. Vlada odkida obviňenje, že proces ima političnu motivaciju.
Pred procesom Timošenko je pověděla žurnalistam: «Nikto ne sumněva odnosno togo, že sudy i prokuratura sut v privatnyh rukah, i že ne bude spravědlivosti.» Odpovědajuč na pytanja ona ne je vstala, a potom je izžedala uvoľňenje suditeľa, kojego je nazvala «pionom v rukah prezidentskogo aparata» i obvinila, že je česť systema «političnyh represij, provadžanyh od strany vlady».
Okolo tyseč ľudi je demonstrovalo pred budynkom suda, aby izraziti podpor dľa vodžici opoziciji. Oni sut nosili transparenty s napisami, kak: «Glas Juliji je glasom naroda», «My budemo obraňati Ukrajinu», «Govorimo NE političnym represijam». Nekoje jejne strannici sut daže všli v salu, kričijuč gasla.
V 2008 godě Ukrajina je platila 179,50 dolarov za 1000 m3 rosijskogo gaza. Poslě konflikta medžu Rosiju i Ukrajinoju o gazě, Timošenko je se dogovorila s rosijskom premierom Vladimirom Putinom, že Ukrajina bude platiti novu cěnu 450 dolarov. Soglasno sejčasnoj vlady toj dogovor byl dľa Ukrajiny nekoristny.
(sl)
